Өфө «Нур» дәүләт татар драма театры актрисаһы, «Туған тел» телеканалы алып барыусыһы, моңло тауышлы эстрада йондоҙо Айгөл Ғабдуллина – ауырлыҡтарҙан һис өркмәй, үҙ маҡсатына ҡыйыу атлаған үткер фекерле, зирәк һәм талантлы йәштәребеҙҙең береһе. Бигерәк тә «Туған тел» телеканалын һөйөүселәр ҡотлауҙар тапшырыуы менән туғыҙынсы йыл дауамында аҙна һайын эфирға сыҡҡан мөләйем, татлы телле, ихлас һылыуҙы инде күптән үҙ итеп өлгөргән. Сибәр актрисаның ижади эшмәкәрлеге һәм тормош юлы күптәрҙе ҡыҙыҡтыра. «Башҡортостан ҡыҙы»на ул ихлас күңел серҙәрен асты.

…Ҡыҙға өс йәш. Бына ул байрамса биҙәлгән ауыл мәҙәниәт йортонда әсәһе уға махсус һалған «Башҡорт полька»һын бейергә әҙерләнә. Дәртле башҡорт көйөнә атылып сәхнәгә сыҡҡан ҡыҙсыҡ һығылмалы, нәзәкәтле ым-хәрәкәттәре менән тамашасы күңелен шунда уҡ әсир итә! Тәүге сығышын, ундағы һәр тын алышын, ҡул сабыуҙар менән оҙатылған татлы тәьҫораттарҙы Айгөл әле лә йөрәгендә йөрөтә. Бөгөн тотоп шул бейеүҙе башҡарырға ҡушһалар, күҙен йомоп, һәр хәрәкәтен сатнатып бер тында ҡабатлар ине. Бигерәк тә көйө хәтеренә мәңгелеккә уйыла һәм башҡорт моңона булған тәрән һөйөүҙе ул ошо ваҡиға менән аңлата.

Саҡмағош районы Имәнлеҡул ауылына юллама буйынса килеп төпләнгән Хәйҙәр Наил улы менән Фәйрүзә Әхсән ҡыҙының тормоштарын йәмләп тыуған тәүге сабыйҙары Айгөлдөң мөғжизәле сәнғәт донъяһына беренсе аҙымы шулай башлана…

Альбина ҒӨБӘЙҘУЛЛИНА.

Мәҡәләнең тулы вариантын журналдың 5-се (2017) һанында уҡығыҙ.