Имен тормош ҡәҙерен, тыныслыҡтың ниндәй ҡорбандар биреп яуланғанын йәш быуындар ҙа белергә тейеш! Ошо маҡсат менән Башҡорт ҡатын-ҡыҙҙары йәмғиәте Ф. Мостафина исемендәге 20-се Өфө ҡала башҡорт гимназия уҡыусылары менән берлектә «Башҡорт ҡатын-ҡыҙы һәм Еңеү» тип аталған батырлыҡ дәресен үткәрҙе. Яу йылдары хаҡындағы ярһыу хәтирәләр, изге теләктәр, уҡыусылар тарафынан әҙерләп күрһәтелгән һиҫкәндергән дә, уйландырған да хәрби йырҙар, бейеүҙәр, һуғыш тураһындағы шиғырҙарҙан торған концерт афәтле Бөйөк Ватан һуғышы йылдары шаңын һәм данын ҡайтауаз итеп яңғыратты.