Исеме есеменә тап килеп, һәр ваҡыт нур көлтәһе кеүек теремек ҡыҙ иртәнсәк һуҡмаҡ буйлап төшөп, Төйәләҫтең саф, йомшаҡ һыуында йыуынырға, мәғрур Ирәндек түбәләренә ҡарап һоҡланырға ярата. Ул бәләкәй саҡта уҡ ата-әсәһе яҡындағы Сибай ҡалаһына күсһә лә, Нурияның күңеле Баймаҡ районының хозур төбәгендә урынлашҡан Ғәҙелша ауылына – өләсәй-олатайлы, әкиәтле йәнтөйәгенә тартыла. Кискеһен йәшел сирәм өҫтөндә ултырып сәй эскәндән һуң ололар көндәлек эштәрен барлай, иртәгәһе көнгә ниәттәр ҡора. Ә бер-береһенә иш һәм иптәш булып үҫеп килгән балалар сабыр ғына көтөп ултыра, сөнки етди һөйләшеүҙән һуң уларҙы алда иң ҡыҙығы – серле әкиәт донъяһы көтә. Ана шул олатай-өләсәйе һөйләгән әкиәттәр тәьҫирендә изгелектең яуызлыҡты еңеренә ышанып, яҡтылыҡҡа ынтылып, яҡшылыҡтар ҡылып йәшәргә кәрәклекте аңына һеңдереп үҫә Нурия Һаҙый ҡыҙы Рафиҡова.

«Башҡортостан ҡыҙы» – минең тормошомда»

Нурия Һаҙый ҡыҙының китап ене ҡағылған, тиҫтәләгән гәзит-журнал алдырып уҡыған ғаиләлә тәрбиәләнеүе хаҡында әйтеп үткәйнек инде. Үҫә төшкәс, ул үҙе лә мәҡәләләр яҙа башлай. Сибай педагогия училищеһында уҡыған осоронда – йәш хәбәрсе, Ҡыҙылъярҙа йәшәгәнендә Өфө район гәзитенең иң әүҙем ауыл хәбәрсеһе булып таныла. Беҙҙең журнал менән дә Нурия ханымды оҙайлы, ныҡлы дуҫлыҡ ептәре бәйләй. «Әсәйем ғүмере буйы «Башҡортостан ҡыҙы»н алдырҙы, яратып уҡыны, был дуҫлыҡты мин дә дауам иттем, – тип һөйләй ул. – 1994 йылда журналдың тышлығында – ғаиләбеҙҙең фотоһы, эске өлөшөндә беҙҙең хаҡта яҙылған йылы, матур мәҡәлә донъя күрҙе. Ул саҡта өлкән улыбыҙ Илнур әрме хеҙмәтендә, Илгиз, Рәмил, Айгөл мәктәп уҡыусылары ине. Ошо мәҡәләнән һуң улдарыма Башҡортостандың төрлө мөйөштәренән ҡыҙҙар яҙған хаттар ағылды. Үҙе бер ҡыҙыҡ, күңелле ваҡиға булып ҡалды ул мәлдәр...»

Аң-белемгә ынтылыш, мәғрифәтселек ҡанына һеңгән Нурия Рафиҡова бөгөн арымай-талмай башҡорт матбуғатына хеҙмәт итә. Сибайҙан Ҡыҙылъярға кире күсеп килгәс, уны, элекке ауыл хәбәрсеһен, ҡушҡуллап Өфө районы гәзитенә эшкә саҡыралар. Ҙур теләк һәм ихласлыҡ менән «Өфө үҙәндәре» тип аталған башҡортса ҡушымтаны ла әҙерләп сығара. Әлеге ваҡытта республиканың абруйлы баҫмаларының береһе һаналған «Ватандаш» журналында эшләй.

Гөлдәр СӘЛИХОВА.

Мәҡәләнең тулы вариантын журналдың 9-сы (2017) һанында уҡығыҙ.