Зиһене камил, дүрт һаны теүәл булып тыуһын – бәпес көткән һәр ата-әсәнең доғаларға ҡушып көнө-төнө ҡабатлаған иң изге теләге шул. Хәйер, ғаиләнең, нәҫелдең генә түгел, милләттең, дәүләттең дә киләсәге ул сәләмәт бала. Ҡыҙғанысҡа ҡаршы, төрлө сирҙәр менән донъяға килгән сабыйҙар һаны йылдан-йыл арта. Ата-әсәһен ҡыуандырырлыҡ, ил ҡеүәтен арттырырлыҡ аҡыллы, һау балалар тыуһын өсөн ни эшләргә? Ғүмер буйы ҡатын-ҡыҙ һаулығы һағында торған табип, медицина фәндәре докторы, Башҡорт дәүләт медицина университеты профессоры Әлфиә Ғәлим ҡыҙы ЯЩУК шул хаҡта күп йыллыҡ тәжрибәһенә нигеҙләнгән баһалап бөткөһөҙ фекерҙәре менән уртаҡлаша.

...Балаларҙың сырхау тыуыуының етди сәбәптәренең береһе булып йод һәм фолий кислотаһы етмәү тора. Әсә ҡарынында ятҡанда, бәләкәй саҡта был матдәләргә ҡытлыҡ кисереү ҙурайғас аҡыл, физик, енси үҫеш йәһәтенән артта ҡалыу ҡурҡынысы менән янай...

...Хәҙерге заман ғилми тикшеренеүҙәре шуны раҫлай: бәпес яралмаҫ борон уҡ йод һәм фолий кислотаһы ҡабул итеү тыумыштан үҫеш кәмселектәрен, үҙәк нервы системаһындағы тайпылыштарҙы булдырмау өсөн беренсел мөһим сара булып тора. Сөнки баланың үҫешенә нигеҙ йөклөлөктөң иң тәүге мәлендә, 4-6-сы аҙнала, йәғни әсә табипҡа мөрәжәғәт итеп, унан кәңәш алғансы уҡ, һалына. Әлеге мәлдә республикала ауырлы ҡатындарҙың тик 3-4 проценты ғына әсә булырға планлаштырғанда һәм йөклөлөктөң тәүге 6-8-се аҙнаһында йод һәм фолий кислотаһы ҡабул итә...


Мәҡәләнең тулы вариантын журналдың 1-се һанында уҡығыҙ.