«Ил-йортом тыныс, донъям ҡотло, ғаиләм татыу, балам имен, яҡындарым һау булһын!» – ҡатын-ҡыҙ башында иң элек ошо ябай, шул уҡ ваҡытта үтә лә мөһим уй-теләк. Өй ғәменең ил ғәменән айырылғыһыҙлығын, ҡатындар берләшһә, тауҙар аҡтарырлыҡ ҡеүәт хасил булыуын Ишембай гүзәлдәре миҫалында күрергә мөмкин. Эйе, башҡорт нефтен тәүләп асыуы менән тарихҡа ингән, машиналар эшләү, химия, еңел һәм аҙыҡ-түлек сәнәғәте менән дан тотҡан төбәктең үҙенсәлеген һуңғы йылдарҙа ҡатын-ҡыҙҙар хәрәкәте әүҙемләшеп, ғәйәт ҙур көскә әйләнеүе лә билдәләй. Ишембайҙарҙың һөҙөмтәле, матур эштәрен өйрәнеү маҡсатында бында Башҡортостан Республикаһы Ҡатын-ҡыҙҙар союзының зона конференцияһына күрше-тирә райондарҙан һәм ҡалаларҙан уларҙың әхирәттәре йыйылды.




...Ишембай һылыуҙарының башҡалар менән бүлешерлек уңышының сере нимәлә? Һорауға яуап, бәлки, Гүзәл Ғайса ҡыҙының түбәндәге һүҙҙәрендәлер: «Улар ауырлыҡтан, яуаплылыҡтан ҡурҡып тормай, иң ҡатмарлы мәсьәләне хәл итеүҙе лә ҡыйыу үҙ өҫтөнә ала». Тамыр йәйгән афәт – эскелеккә ҡаршы ауылдарҙа ысын мәғәнәһендә ҡаһарман көрәш, көмөшкә ҡыуыусыларға яу асыу, ауыр тормош хәлендәге ғаиләләр менән ихлас йөрәктән эшләү, экология өмәләре, мохтаждарға ярҙам итеү өсөн хәйриә марафондары үткәреү, 50-60 йыл һәм унан күберәк бергә ғүмер кисергән парҙарҙы тәбрикләү – совет башҡарған эштәрҙең бер нисәһе генә былар. Йәмәғәт башланғысындағы ойошма, асылда, һанап бөткөһөҙ социаль бурыстар атҡара. Уға 2000-дән ашыу ҡатын-ҡыҙ йәлеп ителгән, шуларҙың 180-е айырыуса ҙур әүҙемлек күрһәтә. Ағинәйҙәр ҡоро һәм былтыр ойошторолған атайҙар советы менән бер төптән булғас, һәр изге башланғыс дәррәү, ырамлы дауам итә...

...Ҡатын-ҡыҙҙың миһырбанлы аҡылына, нескә тойомлауына, тапҡыр фекеренә таянған урындарҙа донъя балҡытырлыҡ эштәр ғәмәлгә ашырыла. Ишембайға сәфәр ҡылып, йәнә бер тапҡыр шул хәҡиҡәткә инандыҡ...


Мәҡәләнең тулы вариантын журналдың 4-се һанында уҡығыҙ.