[/b]Сабыйыңа, үҙеңә йәки тормош иптәшеңә яңы әйбер бәйләп, ҡараңғы, һалҡын көндәрҙе лә йылытып, яҡтыртып ебәрергә мөмкин.
Ҡыш аҙағында, март айында ла әле аҡман-тоҡман бураны ҡоторған саҡта, уңайлы күкрәксә, ҡолаҡсалы башлыҡ, килешле берет әсе елдән, һыуыҡтан һаҡлап ҡына ҡалмаҫ, үҙенсәлеге, сағыулығы менән күңелде иркәләр.

[b]Ҡыҙ бала өсөн күкрәксә[/b]
Түңәрәк энәләр менән бәйләнә.
Муйын үлсәменә тап килтереп, күҙҙәр йыябыҙ.
Кәрәкле бейеклеккә тиклем резинка рәүешендә (1х1) бәйләйбеҙ. Әгәр муйынын оҙонораҡ итергә телә­гәндә, бәйләм бейеклеген ике тап­ҡырға арттырабыҙ.
Ян-яҡтан күҙ өҫтәй алырлыҡ итеп, энәләге күҙҙәрҙе дүрт өлөшкә бүлә­беҙ. Һәр ике сантиметр һайын күҙҙәр өҫтәй барабыҙ – 1 салынған күҙ, 1 уң күҙ, 1 салынған күҙ.
Күкрәксәнең алғы яғына “үрелгән толом” биҙәген бәйләйбеҙ. Биҙәк һыҙма буйынса башҡарыла. Тейешле бейеклеккә еткәс, күҙҙәрҙе ябабыҙ.

[b]Балалар өсөн ҡолаҡлы башлыҡ[/b]

Түңәрәк энәләргә, баштың үлсә­менә тап килтереп, күҙҙәр йыйырға һәм резинка рәүешендә (1х1) 6 сантиметр бәйләргә. Артабан 8 күҙҙән “үрелгән толом” биҙәген башҡарабыҙ. 4 күҙҙән би­ҙәкте ҡабатлайбыҙ. Бәйләмдең дөйөм бейеклеге 15 сантиметрға еткәс, күҙ­ҙәрҙе 6 өлөшкә бүлеп, тиҫкәре яғынан кәметә башлайбыҙ. Биҙәкте дауам итәбеҙ. Ҡал­ған 20 күҙгә еп үткәрәбеҙ һәм тарттырабыҙ. Ҡолаҡтар өсөн резинка ситенән 15-әр күҙ йыйып, уң бәйләм менән 5 сантиметр бәйләргә. Һуңы­нан рәт аша берәр күҙ кәметә барабыҙ. Ике яҡлап ҡалған 4 күҙ бау бәй­ләү өсөн ҡулланыла. Бауҙарҙың осона беркетеп ҡуйыр өсөн йөн ептән йомарламдар яһайбыҙ.

[b]Башлыҡ менән шарф[/b]

3 йомғаҡ зәңгәр, 3 йомғаҡ аҡ еп, 2,5 һанлы ырғаҡлы энә алына.
Башлыҡты бәйләү: түбәһенән башлап ишелмә (спираль) буйынса бәйләнә.
5 буш күҙҙән сылбыр йыябыҙ, тоташтырабыҙ. Сылбырға 12 бер салыу­лы бағана өҫтәп бәйләйбеҙ. Артабан һыҙма буйынса дауам ите­лә. Бил­дәләнгән үлсәмгә тап килерлек түңәрәк бәйләгәс, салыулы баға­налар менән (төҫтәрҙе алмаштырып) 5-6 рәт сығабыҙ.
Артабан “үрмәксе аяҡтары” биҙәге менән бәйләйбеҙ. Бәйләм тамамланғансы ошо рәүешле дауам ителә.
Башлыҡтың ҡолағын бәйләү:
бының өсөн билдәләнгән урын­да епте тоташтырабыҙ һәм 17 салыуһыҙ бағана өҫтәйбеҙ. Бәйләм­де тиҫкәре яғына әй­ләндереп, 15 салыуһыҙ бағана бәй­ләйбеҙ.
3-сө рәт – 13 салыуһыҙ бағана,
4-се рәт – 11 салыуһыҙ бағана,
5-се рәт – 9 салыуһыҙ бағана,
6-сы рәт – 7 салыуһыҙ бағана,
7-се рәт – 5 салыуһыҙ бағана.
Епте өҙәбеҙ. Икенсе ҡо­лаҡ тәүгеһенә оҡшатып бәй­ләнә.
Башлыҡ тирәһен “ҡыҫала аҙымы” биҙәге менән уратып сығабыҙ.
Бау өсөн 3 ептән толом үрә­беҙ һәм ҡолаҡтарға беркетеп ҡуябыҙ. Башлыҡты үҙебеҙ яһа­ған ике йөн йомарлам менән биҙәйбеҙ.
Шарф
30-35 күҙ йыябыҙ һәм башлыҡҡа оҡшатып бәйләйбеҙ.

[b]Өлкәндәр өсөн күкрәксә[/b]


Күҙҙәрҙең һаны муйын үлсәменә һәм бәйләм тығыҙлығына ҡарап билдәләнә.
Төп бәйләм – резинка (1х1).
Муйын тирәһен уңайлы булырлыҡ оҙонлоҡта бәйләгәс, бәйләмде 3 тигеҙ өлөшкә бүлеп, юл һайын күҙ өҫтәй барабыҙ. Артабан “3-тән 3” биҙәге һыҙма буйынса башҡарыла. Күҙҙәр һәр икенсе рәт һайын өҫтәлә – 1 салынған күҙ, 1 уң күҙ, 1 салынған күҙ. Ошо рәүешле 15 сантиметр бәйләгәс, һәр рәт ситенән 1-әр күҙ кәметеп, бәйләмде тамамлайбыҙ.



[b]Әсәй өсөн зауыҡлы берет[/b]

Түңәрәк энәләр менән бәйләнә. Баштың үлсәменә тап килтереп, күҙ­ҙәр йыябыҙ. Резинка рәүешендә (1х1) 3 сантиметр бәйләгәс, күҙҙәрҙе 6 тигеҙ өлөшкә бүлеп, һәр икенсе рәт һайын берәр күҙ салып алабыҙ. Ғөмүмән, һәр 2-се рәттә 6 тапҡыр 6-шар күҙ өҫтәлергә тейеш.
Артабан “3-тән 3” биҙәге менән 6 сантиметр тирәһе бәйләйбеҙ. Дөйөм бейеклеге 12 сантиметрға еткәс, тағы 6 тигеҙ өлөшкә бүлеп, кәметә башлайбыҙ. Ҡалған 20 күҙ­ҙе епкә йыябыҙ һәм тарттырабыҙ. Йылы ла, килешле лә берет әҙер. Ҡыуанып кейегеҙ!