Ауырғазы районы Талбазы ауылында йәшәүсе Рәйфә менән Салауат Исламғоловтарҙың ғаиләһе хаҡында һүҙҙе дауам итеп, уларҙың татыу тормошона тағы ла йәм, йылылыҡ өҫтәгән оҫта хужабикәнең татлы аштары тураһында һөйләп үтмәк­себеҙ.
“Кәйефең ниндәй булған хәлдә лә, тормош иптәшеңде тәмле аш, йылы һүҙ менән ҡаршы ал”, – тип өйрәтте беҙҙе әсәйем. Мин ғаиләлә өлкән ҡыҙ булараҡ, кескәй туғандарымды хәстәрләп үҫкәнгәме, һәр эшкә яуаплы ҡарап өйрәнгәнмен. Тормош юлдашым, балаларым ҡайтҡанда, өй бөхтәлек, таҙа­лыҡ, яҡтылыҡ менән балҡып торһон, өҫтәлдә йылы ризыҡ булһын, тип тырышам. Тирә-яҡтағы бөхтәлектән, яңы бешеп сыҡҡан аш еҫенән үҙемдең дә кәйефем күтәрелә.
Ашарға бешереүҙән нин­дәйҙер ләззәт табам. Китап-журналдан яңы аш-һыу төр­ҙәрен өйрәнәм. Туғандар, таныштар беҙгә ҡунаҡҡа килер­гә ярата – уларҙы яңы ризыҡ менән ҡыуандырмаһам, кү­ңелем булмай”, – ти Рәйфә Хәжиәхмәт ҡыҙы.
Ул Талбазыла “Башҡорт кухняһы”нда ашнаҡсы булып эшләй. Егәрле хужабикәнең үҙенсәлекле аштарын беҙ ҙә тәмләп ҡараныҡ.

Тәмле азу

Талап ителә: 800 грамм ит, 2-3 баш һуған, 500 грамм тоҙло ҡыяр, 200 грамм көнбағыш майы, 2 килограмм картуф.
Нәҙек ярымтүңәрәктәр рәүешен­дә туралған һуғанды, туҡмаслап ҡыр­ҡылған итте майлы табала ҡурабыҙ. Артабан туҡмаслап ҡырҡылған тоҙло ҡыяр өҫтәйбеҙ. Туҡмаслап туралған картуфты тоҙ, онталған ҡыҙыл борос һалып бутайбыҙ ҙа табаға бушатабыҙ. Ҡапҡасы ябыҡ килеш 30-40 минут бешерәбеҙ.

Талбазы кәтлите

Кәтлит өсөн турағыстан үткә­релгән 800 грамм ит, 2-3 баш һу­ған, 2 сей йомортҡа, тәм буйынса тәмләткестәр ҡулланыла.
Барыһын да бергә ҡушып иҙәбеҙ һәм түңәрәктәр әүәләйбеҙ.

Ҡатлам өсөн 500 грамм картуф, 200 грамм сыр, 1 йоморт­ҡа, 2 ҡалаҡ майонез, 1 помидор алына.
Ҡырғыс аша үткәрелгән картуфты майлы табала ҡурғас, тоҙ һибеп, әҙер кәтлит өҫтөнә һалабыҙ. Артабанғы ҡатламға ҡырғыс аша үткә­релгән сыр (сырға майонез һәм йомортҡа һытып ҡушабыҙ), иң һуңынан нәҙек түңәрәк­тәргә ҡырҡылған помидор киҫәктәре һалына. 150 градусҡа тиклем эҫетел­гән мейестә ярты сәғәт тирәһе бешә.

Француз ләүеше

Ҡамыр өсөн 4 стакан он, 1 стакан самаһы шәкәр, 1 йомортҡа, 200 грамм маргарин, балғалаҡ осонда ғына сода алына.
Эслек өсөн 300 грамм эремсек, 200 грамм шәкәр, 1 йомортҡа талап ителә.
Онға шәкәр, маргарин, йомортҡа, сода ҡушып ыуалайбыҙ. Ике өлөшкә бүләбеҙ. Бер өлөшөн табаға тигеҙләп һалып, өҫтөнә шәкәр, йомортҡа һы­тып туғылған эремсекте ҡатлам итеп яғабыҙ. Ҡамырҙың ҡалған өлөшө менән өҫтөн ҡаплайбыҙ. 150–160 градусҡа тиклем эҫетелгән мейестә 20–25 минут тотабыҙ.


Альбина ҒӨБӘЙҘУЛЛИНА яҙып алды.
Александр ДАНИЛОВ фотолары.
Ауырғазы районы.