Беҙ, ҡатын-ҡыҙ­ҙар, барыбыҙ ҙа матур булырға теләйбеҙ. Ошонда бөтә донъяға билдәле модельер Коко Шанелдең: «20 йәштә тәбиғәттән бирелгән, 30-ҙа тормош әүәләгән, ә инде 50 йәштә үҙегеҙ лайыҡ бул­ған йөҙгә эйәһегеҙ», – ти­гән һүҙҙәрен иҫкә төшөрөү ҙә урынлы булыр.

Күбебеҙ матурлыҡты бит тиреһенең шыма, йыйырсыҡтарһыҙ булыуында тип уйлай. Шуға ла йыш ҡына бит тиреһен тәрбиә­ләйбеҙ, лосьондар менән таҙартабыҙ, дымландырыу­сы майҙар һөртәбеҙ, туҡ­ландырыусы битлектәр ҡулланабыҙ. Урамға сыҡ­ҡанда тональ крем, пудра һылап ҡуябыҙ, күҙҙәргә һөрмә тартабыҙ, төрлө төҫтәрҙәге иннектәр ҡулланабыҙ, кершән яғабыҙ, ирендәрҙе ҡыҙартабыҙ. Ҡайһы берҙәребеҙ сама белмәй, матур булам тип, көлкөгә ҡалып ҡуя.

Кемдер макияжға бө­төнләй әһәмиәт бирмәй, нисек бармын, шулай яратығыҙ, йәнәһе. Йә ваҡыт тапмай, ашыҡ-бошоҡ ҡына ҡаш, күҙ, ирен «яһайбыҙ». Һәр эштең рәте-сираты булған кеүек, бында ла самаһы ла, үҙенә күрә нескә­лек-серҙәре була икәнен онотмай, үҙебеҙҙе матурларға, яратырға ваҡыт бү­ләйек, әхирәттәр.

Ошоно яҡшы төшөнгән һылыуҙар тормошта була торған берәй иҫтәлекле, бигерәк тә туй, тыуған көн йә башҡа мөһим ваҡиға алдынан профессиональ визажисҡа мөрәжәғәт итә. Сәхнәлә, күмәк кеше ара­һында эшләгән кешеләргә был бигерәк тә мөһим, сөнки дөрөҫ макияж сырайҙы яғымлы күрһәтә, кешеләрҙе ылыҡтыра.

Өфөлә профессиональ визаж оҫтаһы булып танылған Сердар Камбаровты белмәгән гүзәл зат һи­рәктер. Күптәр уның студияһында биҙәнеп ҡарарға хыяллана, тиһәм дә, арттырыу булмаҫ.

Мәжит Ғафури исемендәге Башҡорт дәүләт академия драма театры актрисаһы Фирүзә Парижға Сердар Камбаровҡа барыу мөмкинлеге тураћында әйт­кәс, шатланып риза булды. Баҡтиһәң, Фирүзә лә уның оҫталығы хаҡын­да ишетеп белә, хатта уның студияһында уҡып алыу хыялы менән яна икән.
Театрҙа ҡыҙыу мәл, Туфан Миңнуллиндың «Әсәй­ҙәр һәм бәпәйҙәр» пьесаһы буйынса ҡуйылған спектаклдең премьераһы көтө­лә. Фирүзә лә унда төп рол­дәрҙең береһен башҡара. «Әлеге ваҡытта баҫылып, ҡурҡып йәшәгән ҡатын – ҡаҙаҡ ҡыҙы Алтынсәс образын сәхнәгә сығарырға әҙерләнәм. Өс ай инде эш­кә буянмай йөрөйөм. Макияж урамға сыҡҡанда ыша­ныслыраҡ тойорға ярҙам итһә лә, буянып килһәм, әлеге образға инеүе ауыры­раҡ булыуын һиҙеп ҡалдым», – ти актриса.

...Сердар Камбаровтың әсәһе – Ейәнсура районынан, башҡорт, атаһы – төркмән милләтенән. Нисек популяр булып китеүе­нең серен һорашҡас, ул, йылмайып, эшемә күңел һалып башҡарғанғалыр, ти­не. Бер ханымды биҙән­дереү өсөн сәғәттән артыҡ ваҡыт китә, йәй көндәре таңғы 5-6-нан эш башлайбыҙ, ти Сердар.

... Ул Фирүзәгә актриса булараҡ йыш кәрәккән киске макияж эшләргә ҡарар итте. Әлбиттә, сағыу һәм күҙгә ташланып торорлоҡ буласаҡ, ғәҙәттә, урамға улай буянып сыҡмайҙар, тип иҫкәртеп ҡуйҙы оҫта. Артабан Сердарҙың кә­ңәштәренә ҡолаҡ һалайыҡ:


* Битте таҙалап йыуғас, дымландырыусы май һөр­төлә.

* Ҡаштарға, эҫкәк менән йолҡоп, матур шәкел бире­лә. Йөҙ күрке – ҡаш, тигән­дәр. Юҡҡа ғынамы ни һөлөк кеүек, ҡарлуғас ҡанатылай ҡыйғас ҡара ҡаштар йыр­ҙарҙа данлан­ған! Һары сәс­ле йәки сәс­тәрен һарыға буятҡан ҡыҙ­ҙарға ҡара ҡаш килешмәй. Йыш ҡына ҡыҙ­ҙар сәстә­рен буята ла ҡаш хаҡында онота. Ҡаш сәстән ныҡ айырылып торорға тейеш түгел. Нәҙек ҡаш та хәҙер тарихта ҡалды.

* Татуажға ыңғай ҡарамайым. Дөрөҫ эшләнмәһә, ҡатын-ҡыҙҙы ҡартайта. Әгәр ҙә инде ҡашың булмаһа, татуаж яһатырға мөмкин. Булғанды матур итеп тәрбиәләп, биҙәп ҡуйыуға етмәй барыбер.

* Ҡашты буяғас, тональ крем һөртөлә. Ул муйын тиреһе төҫөнә ярашлы һайлана. Уны ҡолаҡтарға, муйынға, күҙ аҫтарына, танауға тигеҙ итеп яға­быҙ. Ҡыҙарып торған ерҙәр ҡаплана. Хәҙерге тональ кремдар урамға сыҡҡанда тирене туҙандан, ҡояштан, һалҡындан һаҡлай.

* Һуңынан ҡуйыраҡ төҫтәге тональ крем менән бит һыҙаттарын белендереп сығабыҙ. Ошонда инде ҡайһы бер етеш­һеҙлектәрҙе йәшереп ҡуйып була. Яҫы битте йыйнаҡ итеп күрһәтеү, ябыҡ биткә бер аҙ күләм өҫтәү ҙә еңел.
Шул рәүешле Сердар Фирүзәнең танауын «төҙәтте». Баҡти­һәң, актриса «Нәркәс» спектакленең премьераһы алдынан, сәхнәлә яңылыш эләгеп ҡолап, танауын яралай. Сердар уны йәшереп ҡуйҙы, оҙон күренмәһен өсөн, танауҙы бер аҙ «ҡыҫ­ҡартты».

* Тональ кремдарҙың бер уңайһыҙ яғы бар: яғаны бысрата. Әммә профессиональ тональ кремдарҙың, хаҡы ҡыйбатыраҡ булһа ла, сифаты юғары. Улар кейемгә йоғоп ҡалмай. Әммә... ҡатын-ҡыҙ, яға­һы бысранған осраҡта ла, битендәге таптарҙы ҡаплауҙан баш тартырға тейеш түгел.

*Биттәге һыҙаттарҙы ҡылҡәләм менән тигеҙ­ләгәс, ул ялтырап тормаһын, йөҙҙөң рельефы һаҡланһын өсөн, ҡалын итмәй генә пудра һалына.

* Йылмайған кеүек итеп, бит алмаларын түңә­рәк­ләндергәс, ошо түңә­рәккә һәм, уны ҡолаҡтар­ҙың өҫкө яғына ҡарап торған өтөр рәүешенә индереп, кершән яғабыҙ.

* Ҡаштар аҫтына бит тиреһенән бер аҙға аҡһылыраҡ иннек һөртәбеҙ. Ҡайһы бер ҡыҙҙар мәрүәт (перламутр) иннектәр һөртөп ҡуя. Был хәҙер актуаль түгел. Асыҡ алһыу йә башҡа сағыу төҫтәге иннектәрҙе ҡулланыу урынһыҙ.

* Иннектәр ҡойолоп төшөп бөтмәһен өсөн, нигеҙе ҡәләм менән буяла. Күҙ аҫты ҡәләм менән һыҙыла. Кемдең күҙ аҫтары шешмәкләнеп тора, уларға күҙ аҫтын һыҙыу артыҡ. Күҙ ситенә махсус ҡәләмдәр барлығын да белеп ҡуйыу файҙалы.

* Шунан керпектәр буяла. Яһалма керпектәр йә­бештереп, тәбиғи күрен­һен өсөн, уны тушь менән буяп ҡуйыу ҙа хуплана.

* Ирен ситен ҡәләм ме­нән һыҙғас, буяғыс һөр­төлә.



Шулай итеп, Сердарҙың эше тамам булды. Артабан Фирүзә­нең толомдарын матурлау сәс оҫтаһы Светлана Белозероваға тапшырылды.

* Сәскә айырыуса иғтибар биреү мөһим. Һау, ҡаралған сәстәр – матурлыҡ билгеһе, ул йылҡылдап торһон өсөн, туҡландырыусы маскалар яһарға, нин­дәй буяу һайларға һәм башҡа бик күп файҙалы кәңәштәр ишетте унан Фирүзә.

Актриса бер йыл самаһы элек сәсен ҡына ме­нән буяған. Был тәбиғи буяуҙан һуң бер йыл сама­һы химик буяу ҡулланырға ярамай: юғиһә, сәс ныҡ ҡойоласаҡ. Асаланған ос­тарын ҡыр­ҡтырып торор­ға, бөҙрә­ләткестәр, фен ҡулланыу алдынан сәсте яндырып, киптереп ҡуйыу­ҙан һаҡлаусы махсус спрейҙар һиптерергә кеүек ябай ғына кәңәштәрҙе тотоу ҙа ҡатын-ҡыҙға гүзәл­лек бүләк итергә һәләтле.

Ҡыҫҡаһы, был мәҡәлә­нең маҡсаты – кемгәлер реклама яһау түгел, ә ханымдарҙы матур булырға илһамландырыу. Әгәр ошо серҙәр һеҙҙе гүзәл күренергә дәртләндереп ебәр­һә, тимәк, беҙ маҡсатыбыҙға өлгәшкәнбеҙ, тигән һүҙ. Матур булайыҡ!