Сая 90-сы йылдарҙа модала булған үтә ҡыҫҡа итәктәр һәм һуңғы йылдарҙа киң таралған тәнгә һылашып торған салбарҙарға алмашҡа оҙон итәктәр килә. Бар донъяның кейем-һалым рәссамдары беҙгә иҙәнгә етеп торған серле итәк­тәр һәм йылҡылдап торған туҡыманан тегелгән нәфис күлдәктәр кейергә тәҡдим итә. Йондоҙҙар ҙа әленән-әле оҙон ебәк һәм атлас күлдәктәрҙә сығыш яһай. Ҡала урамдарында ла оҙон үтә күренмәле йә бәйләнгән итәкле зифа буйлы ҡыҙ­ҙарҙы һәм ҡупшы ханымдарҙы йыш осратырға мөмкин. Хәҙер, әйткәндәй, бындай итәктәрҙе күн куртка һәм хатта пинжәк йә тиренән тегелгән жилеттар менән кейеү заманса
булып күренер. Ябай спорт кейеме, ялҡыт­ҡан джинсалар урыны­на нәфислек, гүзәллек килә!
Быйылғы яҙ хыялға бай, яғымлы һәм үтә һөйкөмлө булыуҙы көтә. Йәйен оҙон итәктәрҙе сағыу топ һәм биҙәүестәр менән кейәләр. Ә оҙон күлдәктәр тантаналы кисәлә һәм театрҙа ғына түгел, көн һайын һәм һәр осраҡта ла килешер.
Әле ваҡыт булғанда, һеҙгә сағыу йәйге күлдәкте үҙ ҡулдарығыҙ менән тегергә тәҡдим итәбеҙ. Беҙ биҙәкле атлас туҡымала туҡталдыҡ, шәмәхә ерлектә күк, һары һәм башҡа сағыу төҫтәр ҡушыла. 46 – 48-се үлсәм кейем өсөн 3 метр туҡыма (атлас, ебәк, вискоза туҡымалары бара), билбау өсөн 30 сантиметр атлас йәки беше трикотаж туҡыма, төҫө менән тап килгән еп кәрәк булыр.

Көрән күлдәк өсөн шулай уҡ 3 метр туҡыма, еп кәрәк, ә билбауын беҙ ҡаплан тиреһен хәтерләткән флис туҡыманан эшләнек. ≠тә ҡупшы күлдәктәрҙең итәктәре арттан һөйрәлеп тороуына һәм арҡаһында уйым барлығына иғтибар итегеҙ. Бындай кейемдә йәйен тирләтмәй. Сағыу ҡиәфәттә һеҙ таң ҡалдырғыс, гүзәл булып күренерһегеҙ.
Ҡул эшенә оҫта гүзәлдәргә шулай уҡ йоҡа оҙон итәк менән кейергә йәйге топ һыҙмаһын да тәҡдим итә­беҙ. Уға 70 сантиметр фир∆зә тµҫµндәге, 35 сантиметр ҡара тµҫтәге бәйләнгән туҡыма, еп кәрәк. Топ шулай уҡ 46 – 48-се үлсәмгә тәғәйенләнгән.

Йондоҙ СУЛПАНОВА,
Зина ХАРИТОНОВА.
 Александр ДАНИЛОВ фотолары.