Рөстәм Зәки улы республикала күп балалы ғаиләләргә ярҙам күрһәтеү дауам итәсәгенә ышандырҙы: “Ишле ғаиләләр артабан да төрлө льготалар, дотациялар, субсидиялар аласаҡ. Был тәңгәлдә социаль ярҙам кәметелмәй”. Төбәк башлығы ул ярҙамдың адреслы буласағын һыҙыҡ өҫтөнә алды. “Уны баҙар шарттарында ауыр йәшәүселәр – балаларын яңғыҙ тәрбиәләүселәр, инвалидтар, мохтаж башҡа категория кешеләр алырға тейеш”, – тип билдәләне.
Республика етәксеһе мәсьәләнең бюрократик яғына ла туҡталды. Атап әйткәндә, мәғариф министрына льготалар алыу өсөн белешмә йыйыу ваҡытын яңынан ҡарарға ҡушты. Мәҫәлән, балалар баҡсаһына түләү буйынса льготаға белешмәләр йыйыу ваҡытын 1 майҙан 1 июлгә күсерергә тәҡдим итте.